Sarkin Katsina, Dr Abdulmumini Kabir Usman da na Daura, Dr Umar Farouq Umar, sun yi kira ga zaman lafiya da hadin kan kasa gabanin zaben 2023.
Sarakunan biyu sun yi wannan kiran ne daban-daban a fadarsu da ke Katsina da Daura a yayin da suke jawabi ga jama’ar da suka halarci bikin rawani da aka gudanar a fadar biyu ranar Asabar.
A Katsina, Sarkin ya nada Darakta Janar na Hukumar Leken Asiri ta Najeriya (NIA), Ambasada Ahmed Rufa’i Abubakar, a wani biki da ya samu halartar jami’an diflomasiyya da sauran manyan mutane daga sassan kasar nan.
A nasa jawabin jim kadan bayan nadin sarautar, Sarkin ya yi kira ga ‘yan kasar da su rungumi juna ba tare da la’akari da kabilanci ko bangaranci ko addini ba domin ciyar da kasa gaba.
“Najeriya ta taru a nan yau, ku masu kula da tsara manufofi da aiwatarwa, ku yi duk abin da za ku iya don inganta rayuwar al’ummarmu. Idan kuka yi haka, Allah Madaukakin Sarki zai kasance tare da ku, Ya ba ku iko ya kuma karfafa ku, amma idan nufinku shi ne kare muradun ku, to ku sani ba ku tare da Allah,” inji shi.
Ya kara da cewa yayin da lokacin zabe ke gabatowa, dole ne mutane su yi hakuri su sani cewa Allah ya riga ya yanke shawarar wanda za a zaba.
A Daura, mataimakin kwanturola mai kula da shige da fice, Abdulkarim Abdullahi, a matsayin Jakadan Daura Babba.
An gudanar da bikin nada rawani ne a fadar mai martaba sarkin Daura da misalin karfe 12 na rana kuma ya samu halartar manyan mutane daga nesa da na kusa.
Sabon Jakadan Daura Babba a halin yanzu shi ne jami’in kula da fasfot (PCO) a ofishin hukumar shige da fice ta kasa reshen jihar Edo.
A nasa jawabin, Sarkin ya yi kira ga ‘yan Najeriya da su rungumi zaman lafiya da hadin kai kafin da lokacin zabe da kuma bayan babban zabe domin ci gaban kasar.
