Rahotanni daga kasar Brazil sun bayyana cewa za’a yi gwanjon rigar marigayi Pele mai lamba 10 ta tawagar kwallon kafar Brazil ta karshen wasansa a kwallon kafa a kan kudi fam dubu talatin (30,000).
Rigar dai daya ce daga cikin riguna biyu mai lamba 10 da aka yi a wasan Brazil da Yugoslabia a shekarar 1971, in ji kamfanin gwanjon, Hansons, sai dai Pele bai sa rigar ba a wasan, amma ya bayar da ita kyauta ga Abilio Jose de Silba da ake kira Nocaute Jack, wanda ya yi aiki da tawagar Brazil tsakanin shekarar 1960 zuwa 1994.
Daga baya ne wani mai gidan abinci a Shropshire ya sayi rigar, wanda ya yi fatan za a ajiye ta a dakin adana kayan tarihi kuma tun daga wancan lokacin aka ajiye rigar har kawo yanzu.
Wani mai shekara 33, wanda ba ya son a bayyana sunansa ya ce ya sayi rigar a shekarar 2020 daga wani mai tara tsoffin abubuwan tarihi a fannin kwallon kafa kuma za’a sayar da rigar ranar 15 ga Fabrairu mai zuwa.
Pele ya ci kwallo 1,281 a wasanni1,363 a shekara 21 da ya yi yana buga kwallon kafa, har da kwallaye 77 da ya ci wa Brazil a wasanni 92 sai dai tuni dan wasa Neymar ya kamo kwallayen na Pele.
Pele ya mutu a watan Disambar shekarar da ta gabata ta 2022 kuma shi ne dan wasa tilo da ya lashe kofin duniya karo uku, an karrama shi da kyautar fitatcen dan kwallon duniya a karni da aka yi masa a 2000.
