A ranar Laraba ne Hukumar Yaki da yi wa Tattalin Arzikin Kasa Ta’annati (EFCC) ta gurfanar da Abdulsalam Saleh Abdulkarim a gaban Mai Shari’a Mohammed Nasir Yunusa na Babbar Kotun Tarayya da ke Kano.
An gurfanar da wanda ake tuhumar wanda aka fi sani da AA Zaura a gaban kuliya bisa tuhume-tuhume hudu na samunsa ta hanyar karya.
A watan Agustan 2014 a Kano, Zaura ya karbi kudi dala 200,000 daga hannun Dokta Jamman Al-Azmi, inda ya ce yana da karfin hada gwiwa da shi domin hada-hadar kasuwanci.
EFCC ta ce wakilcin karya ne kuma ya sabawa sashe na 1[1) (a) na dokar damfara da sauran laifukan da suka shafi zamba, 2006, kuma hukuncin da ya dace a karkashin sashe na 1 (3) na wannan dokar.
Zaura ya ki amsa laifin da ake tuhumarsa da shi lokacin da aka karanta masa. Daga nan sai mai gabatar da kara Aisha Tahar Habib ta bukaci a dage sauraron karar.
Lauyan da ke kare wanda ake kara, Ishaq Mudi Dikko, Babban Lauyan Najeriya, ya nemi a bayar da belin wanda yake karewa.
Bayan gardama, mai shari’a Yunusa ya yanke hukuncin cewa wanda ake tuhuma ya ci gaba da sharuddan belin da kotu ta bayar a baya.
An dage ci gaba da shari’ar har zuwa ranar 2 ga Mayu, 2023, domin a fara shari’ar.
An fara shari’ar wanda ake kara bayan kotun daukaka kara ta soke hukuncin da mai shari’a AL Allagoa na babban kotun tarayya ya yi.
Zaura ya damfari wani dan kasar Kuwait kudi dala miliyan 1,320,000 bisa zarginsa da cewa yana gina kadarori a Dubai, Kuwait da sauran kasashen Larabawa.
