Gwamnan Jihar Kano Dr. Abdullahi Umar Ganduje ya bayyana cewa Masarautun Kano guda biyar da ya ƙirƙiro sun zo kenan sai mahadi ka ture.
Kadaura24 ta rawaito ana ta rade-radin sabon zaɓaɓɓen gwamnan Kano Engr. Abba Kabir Yusuf zai rushe Masarautu da zarar an rantsar da shi a matsayin gwamnan Kano a ranar 29 ga watan mayu.
Gwamna Ganduje ya bayyana hakan ne yayin jawabinsa na ranar bikin ma’aikata ta bana, wanda aka gudanar a filin wasa na Sani Abacha dake Kano.
” Mun ƙirƙiro Masarautun nan guda biyar don inganta tsaro, don samar da cigaba, inganta tarihi da samar da kananan burane a Kano”. Inji Ganduje
Ganduje ya kara da cewa babu wanda zai rushe wadancan masarautu, sun zama mahadi ka ture Kuma ko mahadin da zai rushe Masarautun ma Allah ba zai kawo shi ba da yardar Allah “.
