Babban turken wutar lantarkin kasar nan ya durkushe karo na uku kenan cikin mako daya, wanda hakan ya jefa rayuwar al’umma cikin daukewar wutar baki daya a Nigeria.
Durƙushewar ta baya bayan nan ta faru da sanyin safiyar yau asabar, da misalin karfe 8:11.
Karanta karin wasu labaran:Yan Nigeria suna samun lantarki tsawon awanni 20 kowacce rana
A makon da muke ciki dai an samu durƙushewar babban turken wutar lantarkin da ta faru a tsakanin ranakun Litinin da Talata.
Rahotanni sun tabbatar da cewa da misalin karfe 8 daidai na safiyar yau, akwai wutar lantarki mai karfin Megawatt 3,042, amma da karfe 7 karfin wutar yana megawatt 3,968, abin mamakin shine da misalin karfe 9 karfin wutar ya koma megawatt 47 kai tsaye.
Zuwa lokacin rubuta Wannan labari ba’a samu cikakken bayani akan sanadiyyar durƙushewar ta yanzu ba, saboda an gaza samun karin haske daag kamfanin tattara lantarki na kasa TCN.
