Shugaban kasa, Muhammadu Buhari, a ranar litinin da yamma, ya dawo daga Addis Ababa bayan halartar taron kungiyar tarayyar Afirka karo na 36 a Addis Ababa, babban birnin kasar Habasha.
Buhari wanda ya tashi daga Abuja zuwa yankin ya halarci taruka uku na zaman lafiya da tsaro, sauyin yanayi da kuma yanayin siyasa a wasu kasashen yammacin Afirka.
Bayan taron kolin kungiyar AU mai taken ‘Acceleleration of the Continental Free Trade Area’, shugaban kasar ya kuma halarci wani babban taro na musamman na shugabannin gwamnatocin kasashen kungiyar tattalin arzikin kasashen yammacin Afrika da aka gudanar a gefe guda.
Da yake jawabi a wajen taro karo na biyu na shugabannin kasashe da gwamnatoci na hukumar kula da yanayi ta yankin Sahel, ya bayyana shirin Najeriya na karbar bakuncin sakatariyar asusun kula da yanayi na Sahel.
A wani taron babban mataki kan gargadin farko a cikin tsarin kwamitin zaman lafiya da tsaro na Tarayyar Afirka da kwamitin leken asiri da tsaro a Afirka, Buhari ya ce samar da bayanai kan lokaci a tsakanin kasashen Afirka na da mahimmanci don samun nasarar taimakon farko da mayar da martani ga barazanar ta’addanci a fadin nahiyar.
Ya kuma bayyana cewa Najeriya ta amince da yarjejeniyar ciniki cikin ‘yanci ta nahiyar Afirka bayan sanya hannu, amincewa da kuma ajiye kayan a hukumar Tarayyar Afirka.
Don haka ya bukaci dukkan kasashe mambobin da har yanzu ba su amince da yarjejeniyar ba da su yi hakan.
A ranar Juma’ar da ta gabata ne ministan harkokin wajen kasar Geoffrey Onyeama ya wakilci shugaban na Najeriya a taron kwamitin sulhu da tsaro na kungiyar AU kan halin da ake ciki a gabashin Jamhuriyar Dimokaradiyyar Kwango.
A gun taron kolin, wanda ya gudana a lokaci guda tare da babban taron SRCC, shugabannin Afirka sun bukaci dukkanin kungiyoyin da ke dauke da makamai da su janye daga yankunan da suka mamaye a gabashin DRC a karshen wata mai zuwa.
Sun kuma yi kira da a gaggauta tsagaita bude wuta daga dukkan kungiyoyi masu dauke da makamai da kuma sake tsugunar da mutanen da rikicin ya raba da muhallansu.
Taron na 36 na AU shi ne na karshe da Buhari ya yi a matsayin shugaban kasa, kuma ziyararsa ta uku zuwa kasashen waje a shekarar 2023.
A halin da ake ciki kuma ana sa ran shugaban kasar zai jagoranci wasu jiga-jigan jam’iyyar APC ciki har da dan takarar shugaban kasa, Bola Tinubu, zuwa Legas a ranar Talata domin babban taron yakin neman zaben shugaban kasa na jam’iyyar.
