Wani tsohon gwamnan babban bankin Najeriya CBN, Sanusi Lamido Sanusi ya ce sabuwar manufar kudi da babban bankin Najeriya ya yi zai hana magudin zabe da ‘yan siyasa ke yi.
A wani gajeren faifan bidiyo da Aminiya ta samu a jiya, tsohon gwamnan na CBN ya kuma bayyana cewa manufar ta samo asali ne tun a shekarar 2012 lokacin yana gwamnan babban bankin, inda ya kara da cewa CBN na ci gaba da abin da ya fara.
Ya ce: “Manufar rashin kudi ta fara ne tun a shekarar 2012 lokacin da nake gwamnan babban bankin Najeriya CBN tare da Legas daga baya kuma ta yadu zuwa jihohi 5. Bayanin da muka bayar a wancan lokacin shi ne cewa duniya tana ci gaba kuma bai kamata mutane su kasance suna ɗaukar tsabar kudi ba, kamar yadda aka gabatar da manufofin tsabar kudi don sauƙaƙe hada-hadar kasuwanci.
“Da farko mutane sun nuna rashin amincewarsu da hakan amma daga baya sun amince da manufar kuma suka fara amfani da hanyoyin biyan kudi daban-daban a gidajen cin abinci, shaguna da sauran wurare.”
Da yake jawabi, ya kuma bayyana cewa, daya daga cikin muhimman muhimman manufofin rashin kudi shi ne, hakan zai hana yin magudi, yayin da ya kuma gargadi ‘yan Nijeriya da su yi watsi da ‘yan siyasar da ke korafi kan manufar.
“Ina so in ba mutane shawara da su yi taka-tsan-tsan da abin da ‘yan siyasa ke cewa game da manufar rashin kudi domin ba ta son su. Sun shafe shekaru hudu ba tare da sun cika aikinsu ba, sannan su dawo da makudan kudade suna tunanin za su iya ba hukumomin tsaro da hukumar zabe cin hanci.
“Abin da manufar ta kunsa a yanzu shi ne dan siyasar da ke son bai wa jami’an tsaro cin hanci ko kuma hukumar zabe, dole ne ya biya a asusun bankin mutane inda za a iya gano cinikin.
