Daga Aminu Abdullahi Ibrahim
Na rubuto maka wannan wasiƙa ne domin in jawo hankalinka kan halin ko-in-kula da filin wasa na Kofar Na’isa cibiyar wasanni dake karamar hukumar Kano Municipal wanda aka fi sani da filin Mahaha.
A matsayina na dan kasa, ina kira gare ka da ka gaggauta daukar matakin farfado da wannan muhimmiyar cibiya domin amfanin al’ummar jihar Kano da na waje da sauran al’ummar yankin da kuma samar da kudaden shiga da jihar ke bukata ta fannin wasanni.
Filin wasanni na Mahaha ya kasance wani muhimmin bangare na al’ummarmu tsawon shekaru da dama tun bayan da tsohon gwamnan jihar Kano Dr. Rabi’u Musa Kwankwaso ya ware shi a matsayin cibiyar koli ta wasanni, filin ya zama fili daya tilo ga al’ummar jihar wajan motsa jiki musamman jam’ar tsakiyar birni.
Farfado da filin zai taimaka wajen samar da wurin gudanar da harkokin wasanni da kuma samar da kudaden shiga ga jihar kano.
Karkashin gwamnati mai barin gado, filin ya yi fama da rashin kulawa ko zuba hannun jari da kuma kula da ayyukan ababen more rayuwa da suke cikin filin sakamakon rashin ko in kula, duk da cewa akwai wasu kayayyakin gudanar da tafiyar filin wasan amma suna da matukar buƙatar sabuntawa, kuma kayan aikin sun tsufa kuma basu isa ba.
Hakan ya sa filin ya zama ba a iya amfani da shi wajen gudanar da harkokin wasanni, sannan kuma ya jawo al’umma da gwamnati asarar samar da aikin yi da zurarewar kadara mai kima da rage kudaden shiga ga jihar.
Farfado da wannan fili na wasanni yana da matukar muhimmanci ga lafiyar jiki da tunanin al’umma, da kuma samar da kudaden shiga ga jihar.
Filin ya kasance cibiyar abubuwan wasanni, haɓaka ayyukan jiki da salon rayuwa mai kyau na kowane zamani. Har ila yau, ya kasance hanyar samun kudaden shiga ga jihar, yana jawo masu yawon bude ido da kuma samar da kudaden shiga ga ‘yan kasuwa na gida da waje.
Ina roƙon gwamnat ka da ta ba da fifiko ga farfadowar wannnan fili zuwa matsayin manya manyan ajandar mulkinka. Ana iya samun wannan ta hanyar haɗin gwiwar tallafin gwamnati, saka hannun jari masu zaman kansu, da sa hannun al’umma.
Tare da goyon bayan gwamnatinka, za mu iya mayar da filin zuwa wani katafaren tsari wanda zai sake zama abin alfahari ga al’umma da samar da kudaden shiga da ake bukata ga jihar.
Nagode Aminu Abdullahi Ibrahim, dan jarida dake Kano.
