Muna da buhunan sabbin takardun Naira — ’Yan bindiga

’Yan bindiga sun saki wani bidiyo suna ikirarin cewa suna da buhu-buhun sabin Naira da aka sauya wa fasali da suke sayen makamai da su.

A bidiyon da ke yawo kafofin sada zumunta, an ji ’yan ta’addan da ke rike da sabbin kudaden suna ikirarin cewa tuni suka fara harkokinsu na ta’addanci da sabbin takardun kudin.

“Wani ma da ake nufi bai samu sabbin kudin ba, amma sun zo hannunmu,” in ji mai magana da yawunsu.

Ya ce buhunan sabbin kudaden, “Da ke gare mu, Allah Kadai Ya san iyakansu… har mun sayi makamai da su.”

A gefe kuma aka ji wani na cewa,“Ina da miliyan goma (na sabbin kudaden a) gida.”

Aminiya ba ta iya tantance gaskiyar ikirarin ’yan ta’addar ba ko kuma lokacin aka dauki bidiyon.

Amma wannan na zuwa ne duk da cewa Gwamnatin Tarayya ta bayyana cewa gurgunta tattalin arzikin ’yan ta’adda na daga cikin manyan dalilanta na sabunta fasalin takardun kudin.

A halin yanzu dai ’yan Najeriya na fama da karancin sabbin takardun kudin, duk kuwa da cewa Babban Bankin Najeriya (CBN) ya kara wa’adin amfani da tsoffin kudin da kwana 10.