A halin yanzu dai wasu masu zanga-zangar suna kan tituna domin nuna rashin amincewa da dokar hana zanga-zangar da ‘yan sanda suka yi.
Kwamishinan ‘yan sandan jihar, Mohammed Usain Gumel, ya haramta zanga-zanga bayan da ‘yan jam’iyyar New Nigerian Peoples Party (NNPP) da jam’iyyar adawa ta APC suka bukaci mambobinsu da su yi ta kwarara kan tituna kan zargin cin hanci da rashawa da ake yi wa bangaren shari’a.
Kwamishinan ya ce duk wani yunkuri na rashin mutunta dokar za a dauki shi a matsayin wani laifi ga tsaron kasa.
Ya ce, “Don haka jama’a su lura da saninmu cewa jam’iyyun APC da NNPP a halin yanzu suna ta tara jama’a na haya da sunan jam’iyyar Civil Society Coalition kuma ba tare da izini daga shugabannin kungiyar kwadago ta Najeriya ba, ba tare da amincewar hukumomin tsaro a jihar ba.
“Ya kamata masu shirya taron da na kungiyar su lura cewa duk wani yunkuri na rashin mutunta kungiyar NLC da Hukumomin tsaro a jihar, ta hanyar yin wasa da yanayin rashin tsaro, wanda hadin gwiwar hukumomin tsaro ke gudanarwa, ba wai kawai na rashin zaman lafiya ba ne, laifi ne kuma da ya shafi Tsaron Kasa.”
Amma jim kadan bayan umarnin, masu zanga-zangar sun yi cincirindo a kan tituna inda suka nufi gidan gwamnati.
